सरकारलाई पर्खिएनन् उमेश, आफ्नै खल्तीबाट सडकको खाल्डा पुरे

कोहलपुर । सडकका खाल्डाखुल्डीले सर्वसाधारणलाई सास्ती दिइरहँदा कोहलपुरका एक युवा निर्माण व्यवसायीले भने ‘सरकारले गर्ला’ भनेर पर्खिएनन्। आफ्नै खर्चमा सडक मर्मत गर्न अघि सरेका छन् उमेश जंग ठकुरी।

कोहलपुर नगरपालिका–११ स्थित नेपालगन्ज मेडिकल कलेजको पूर्वतर्फ न्युरोड चोकमा लामो समयदेखि बिग्रिएको सडकमा खाल्डाखुल्डी थिए। सवारीसाधन र पैदल यात्रुलाई आवतजावतमा समस्या भइरहेको अवस्थामा ठकुरीले आफ्नै लगानी तथा उपलब्ध स्रोत–साधन प्रयोग गरेर खाल्डाखुल्डी पुर्ने र आवश्यक स्थानमा पिच गर्ने काम थालेका हुन्।

सार्वजनिक सडक मर्मतको मुख्य जिम्मेवारी सम्बन्धित सरकारी निकायको भए पनि तत्काल सडकको अवस्था सुधार गर्नुपर्ने आवश्यकता देखेपछि व्यक्तिगत पहलमा काम अघि बढाएको ठकुरीको भनाइ छ।

सडकमा परेको खाल्डो पुर्न प्रयोग भएको रकमभन्दा नागरिकलाई सहज रूपमा हिँड्न सक्ने वातावरण बनाउने सोच ठूलो भएको स्थानीयको प्रतिक्रिया छ। उनको यो पहलले सडकको तत्कालीन समस्या केही सहज बनाउनुका साथै सार्वजनिक पूर्वाधारप्रति नागरिकको जिम्मेवारीबारे पनि बहस सिर्जना गरेको छ।

रोचक पक्ष के छ भने, यही स्थानमा यसअघि पनि कोहलपुरका सामाजिक अभियन्ता कृष्ण खड्काले आफ्ना साथीभाइसँग मिलेर व्यक्तिगत खर्चमै सडकका खाल्डाखुल्डी मर्मत गरेका थिए।
एकै ठाउँमा पटक–पटक नागरिक आफैं सडक मर्मतमा उत्रिनुपर्ने अवस्थाले भने अर्को प्रश्न पनि खडा गरेको छ—सार्वजनिक सडकको दीर्घकालीन मर्मतसम्भारको जिम्मेवारी आखिर कसको हो?

नागरिकको पहलले तत्काल राहत दिन सक्छ, तर सडकलाई दिगो र व्यवस्थित बनाउन सम्बन्धित स्थानीय तह तथा सरोकारवाला निकायले नियमित अनुगमन, गुणस्तरीय मर्मत र दीर्घकालीन स्तरोन्नतिमा ध्यान दिनुपर्ने देखिन्छ।